文章日期 : 2019年2月14日

燈光展打卡 情人節放閃換領愛情鎖

【明報專訊】今日情人節,唔少人會外出慶祝影相放閃,旅發局喺中環海濱嘅打卡熱點「國際燈光藝術展」,就會特別加推浪漫愛情鎖活動,大家喺今日下晝5點至晚上11點嘅亮燈時間內到場影相,然後上載社交網站並主題標籤(hashtag)呢個活動名「#hkpulselightfestival」,就可以換領免費愛情鎖,場內亦有特設嘅網欄畀大家掛鎖。

國際燈光藝術展即日起至24號每晚舉行,展出15件作品,當中有7件以「愛與浪漫」為主題,好似一個逾3米高嘅心形燈光藝術作品「心跳回憶」,啱晒想影相留念嘅情侶,現場亦有一條50米長光影隧道,配合主題變成粉紅色,又會有走馬燈效果展示多個心形圖案。

另外,「年度Mastercard愛情指數」分析過去3年情人節期間消費者以信用卡等所作交易。結果顯示,港人傾向等到最後一刻先買情人節禮物,大部分與情人節相關嘅消費(28%)都喺2月14日進行。喺過去3年嘅情人節期間,餐廳嘅交易量增加20%,總消費額上升30%。