文章日期 : 2019年2月1日

IVE老師教路 酒店走廊盡頭房唔差

【明報專訊】去旅遊少不免住酒店,以往坊間有傳言話走廊盡頭嘅房間陰氣較重,最好唔好住,不過,香港專業教育學院(IVE)(黃克競)酒店及旅遊系系主任張俊文就話,呢啲房因為設計格局考慮,可能面積都會較大,反而有機會景觀開揚啲。而如果大家想睇吓間房嘅衛生程度,可先留意房內玻璃杯有無手指印,因為專業房務人員係唔會喺玻璃杯留下指模嘅;然後亦可檢查一下枕頭套有無更換,換過嘅枕頭套通常都熨貼整齊。另外,牀頭板及燈罩頂係咪一塵不染等細節,都顯示到酒店房務清潔嘅專業程度。

睇衛生程度 先睇玻璃杯

IVE訓練酒店業人員,會派學生海外實習。IVE兩名酒店及餐飲業管理畢業生上年就去咗法國四星級酒店實習取經,深深明白到要清潔好酒店房間一啲都唔易。上年去咗法國實習嘅陳曉晴話,法國酒店對整潔度要求好嚴格,浴缸要零指紋印,牀頭板亦要清潔乾淨。

另一名實習學生楊寶盈就去咗酒店餐廳做服務員,每次都要托起幾隻又大又重嘅碟,佢亦都去咗餐廳偷師,如學吓點整意大利芝士蛋糕同甜點擺盤技巧等。