文章日期 : 2019年1月28日

廚藝學院教埋歐洲地中海菜

【明報專訊】香港作為美食之都,各地菜式都有得食,職業訓練局國際廚藝學院先後喺本學年增設西式包餅及糖藝高級文憑課程,下學年仲計劃開設國際廚藝文憑課程,涵蓋歐洲、亞洲同地中海等菜系,未來出街食飯,相信選擇會愈來愈多啦。

澳門鬥廚藝 20歲包餅學員奪銀

國際廚藝學院由2014年開始招生,每年學員大約2000人,院長顏淑賢話,本港愈來愈多新餐廳,涵蓋各種菜系,已經唔似以前只限於法國、意大利、日本同韓國菜等,𠵱家仲多咗南美等地菜系,佢認為文憑課程可以滿足行業對呢方面嘅人手需求。

■ 新一代廚師 中西紮實廚功 創意烹調色香味美

20歲嘅陳彥樺係學院西式包餅及糖藝文憑課程嘅學生,佢話細個見到媽媽整蛋糕,覺得好有趣;加上哥哥同爺爺都係廚師,可能因為家庭背景影響,佢都愛上煮嘢食。陳彥樺去年代表香港去澳門參加「穗港澳蓉青年技能競賽」,喺糖藝/西點項目奪銀獎;佢現時每周有3日返學受訓,其他時間就喺一間五星級酒店做兼職包餅學徒,希望累積經驗,最終自己開一間咖啡店。