文章日期 : 2019年1月23日

海洋公園水獺六口家 時分秒命名

【明報專訊】去海洋公園除玩機動遊戲,仲有好多動物可睇,家陣又多4隻小爪水獺寶寶同1隻海豚寶寶同大家見面喇。

海洋公園動物及保育執行總監Michael Boos同Emily講,水獺父母係去年1月被漁護署充公嘅動物,4月先搬到海洋公園。水獺奉行一夫一妻制,呢對夫婦名為「時」和「分」。

時和分舊年8月做咗爸爸媽媽,生咗4個可愛小寶寶,3女1男水獺BB分別叫做「Miu」(中文「秒」嘅英文拼音)、「Centi」(厘秒英文縮寫)、「Milli」(毫秒英文縮寫)同「Mei」(中文「微」秒英文拼音)。「時分秒」一家六口住喺公園「亞洲動物天地」,由水獺父母同護理員照顧住4隻5個月大嘅小寶寶。

另外一隻海豚寶寶Ginger去年12月出世,海豚係哺乳類動物,由媽媽餵哺,預計要3至4年後先會慢慢斷奶。佢家陣成日同阿媽追逐遊玩,非常活潑。若想睇海豚BB,可以去「海洋哺乳動物繁殖及研究中心」留意有無一隻小海豚貼住媽媽游嚟游去啦。