文章日期 : 2019年1月18日

燈光藝術展 加愛與浪漫迎情人節

【明報專訊】上月開始嘅「國際燈光藝術展」叫好又叫座,旅發局星期五開始會展出新一批以「愛與浪漫」為主題嘅燈光藝術作品,迎接情人節,當中包括本地同外國設計嘅互動裝置。

陌生人對望1分鐘

旅發局喺添馬公園至中環碼頭位置搞戶外光影展。周五起會加7個展品,仲有多個係互動裝置。Emily最鍾意由港人設計嘅「從現在開始我們就是一分鐘朋友」,呢個裝置畀兩個互不相識嘅人,企喺裝置中間互相凝望,裝置會以燈光倒數60秒,畀遊人感受小鹿亂撞感覺。姊妹們,一見鍾情可能就係咁嚟㗎喇!

另外,嚟自日本嘅團隊亦帶嚟新裝置「Birds Fly Around With You」,當遊人進入圓圈裝置入面,四周嘅雀仔會隨住途人位置逐一亮起。入去嘅觀眾增加,着燈嘅雀亦會增加,情侶都可以一齊入去玩。

旅發局話,舊年11月底至本月初,有成50萬人次入場,估計至展期完結將有100萬人次到場。旅發局節目及旅遊產品拓展總經理洪忠興好開心咁話,入場人次超出佢原來嘅保守估計,覺得好高興同鼓舞!

提提大家,新一輪展覽由本周五開始至2月24日,繼續喺中西區海濱長廊(中環段)舉行,每日下午5時至晚上11時着燈。