文章日期 : 2018年12月7日

明朝絲路地圖 科學館有得睇

【明報專訊】鐘表除咗報時,原來仲有好多用途!Emily噚日參加科學館嘅「匠心獨運──鐘表珍寶展」同「絲路山水地圖展」開幕禮,一次過睇晒由故宮博物院提供嘅120組珍貴機械鐘表,同埋全長30米嘅《絲路山水地圖》。呢兩個展覽今日開放畀公眾,大家今次一定大飽眼福!

另展故宮120組鐘表珍藏

科學館總館長陳淑文話,康文署同故宮博物院嚿年年底續簽5年合作意向書,今次為首兩個合作展覽,預計可吸引18萬人次入場參觀。「鐘表珍寶展」展出120組嚟自英國、法國、瑞士等嘅機械鐘表、5件中國古代計時儀器等。

部分展品從未故宮外展出

陳淑文話120件鐘表中,11件係首次於故宮以外展出,14件屬國家一級展品,Emily最鍾意嘅係「銅鍍金嵌料石轉人升降機塔鐘」,佢有3個鐘盤,除咗睇到時間,開動後仲可聽音樂,鐘身嘅儀仗隊亦會轉動!展覽亦重現18世紀歐洲工匠嘅工作間,並得到倫敦科學博物館借出當時製造鐘表嘅工具,呈現鐘表匠工作情景。

至於《絲路山水地圖》,呢幅地圖係以青綠山水風格繪成,為明朝嘉靖年間嘅宮廷繪畫,成為故宮博物院藏物後從未對外展出。今次亦係康文署首次將全卷文物展出,要搵合適位置相當有挑戰!陳淑文話地圖着重記錄地理位置,所以只有山、水、城樓及城池等,無人或動物。科學館因而另設地圖動畫,加入人民生活情景等,令展覽更加豐富!「鐘表珍寶展」展期去到明年4月10日;而「絲路山水地圖展」就至明年2月20日。