文章日期 : 2018年11月22日

飛機九龍城天台掠過 VR重現舊香港

【明報專訊】旅遊發展局聯同天際100合作推出「VR時光倒流香港遊」微電影,旅客去到天際100,可以戴上VR(虛擬實境)眼鏡,體驗一下由天際100穿越到老香港,回味以前嘅中環同九龍城。

兩套合共5分鐘嘅短片,其中重現1960年代嘅中環荷李活道,附近建築同攤檔都參照咗好多書、文件同黑白片而重塑,為咗增加短片趣味,文武廟外仲會上演一齣英雄救美,兩名演員拳來腳往。另外一條短片就重溫1980年代嘅九龍城,玩家會「企喺」舊樓天台,見到飛機呼嘯飛過,耳邊仲傳來愈嚟愈大嘅引擎聲,相信呢個moment亦係唔少港人嘅集體回憶。

要睇呢兩條片,先要畀188元(成人)入天際100,即場睇要30元,買走就要50元,咁就幾時睇都得。如無VR眼鏡,就要再畀20元買紙製VR眼鏡。