文章日期 : 2017年10月4日

fb講氣象常識反應佳 岑智明小fans問完天氣問功課

【明報專訊】天文台長岑智明(圖)噚日同一班記者食飯講科學教育,席間提到佢喺facebook都相當活躍,台長就話自己日頭返工,夜晚好多時都會上吓fb,講講氣象常識。台長同Emily講,好多小朋友會發信息畀佢問天氣,甚至係問書問功課;仲有中學生同佢講,返學就無心機,講到氣象就有心機,問佢可以點喺呢方面進修喎。

爆應徵者畫圖都唔識

台長就話,今個月25日將會喺香港科學園講talk,題目係「做台長有得揀?」,佢話將會分享自己細個嘅經歷,一路以來嘅選擇又點樣令佢今日成為台長,但具體內容佢就大賣關子,話到時聽就會知,仲話會考慮fb直播講座,等多啲人可以聽到佢嘅分享。

同場嘅港科院院長徐立之早排話大學工程收生「削足就履」,連無讀物理同高數嘅學生都收,岑智明就話天文台請人都好嚴格,點都要讀過呢啲科目,仲會再考吓應徵者,因為唔可能請咗佢之後由頭教過。台長仲爆料,話試過有應徵者話係氣象學博士,點知叫佢畫個溫度計同標示都唔識,畫咗個波板糖形狀圖案出嚟就停晒手。