文章日期 : 2017年10月4日

飛虎訓練 拍片展現第一身視角

【明報專訊】美國賭城槍擊案,令人關注各地恐怖分子或暴徒嘅行為,當地執法單位有無足夠能力應付。警方噚晚喺facebook上載一段內部精銳部隊飛虎隊(SDU)嘅訓練片段,片長兩分鐘,介紹海陸空訓練情况,其中展示新型裝甲車,以及隊員點樣由直升機游繩到貨船調查嘅過程。Emily聽講,由於隊員身分要保密,部分片段由飛虎隊員配備嘅GoPro前置鏡頭,由隊員自己拍攝,好有現場感。

警方邀請咗經常喺電影中飾演飛虎隊教官嘅藝人王敏德講開場白。片段可見,有飛虎變身「迷彩人」埋伏草叢、乘搭新型裝甲車出勤、爆破入屋搜查指定單位等;片段又展示機場嘅演習行動,海上行動除咗快艇追截,亦有飛虎隊員喺直升機游繩落大型貨輪嘅場景。除咗飛虎隊,警方反恐特勤隊、機場特警、密閉空間搜查隊、爆炸品處理課、網絡安全及科技罪案調查科等,都係參與反恐工作嘅主要單位。