文章日期 : 2017年9月14日

會送石油氣單車高手 黃金寶:臥虎藏龍

【明報專訊】旅遊發展局10月8號將會舉行單車節,近日唔少宣傳攻勢,包括講吓喺街踩單車嘅樂趣同技巧啦,近日就搵嚟「亞洲車神」黃金寶,同民間單車高手、平日喺深水埗踩單車送石油氣嘅雄哥齊齊講吓踩單車,兩人可以話惺惺相惜。

65歲嘅雄哥送石油氣達30年,幾乎日日都踩單車喺馬路穿梭送貨,原來佢架單車已有50年歷史,單車本身重逾120斤(72至78公斤),如果擺滿7罐大石油氣,更加負重近500斤。黃金寶平日踩開以碳纖維製造、非常輕身嘅公路單車,拍攝當日膽粗粗試踩雄哥部「重量級」單車,都要花啲時間先掌控到,難怪連見慣大場面嘅阿寶都笑言﹕「香港車壇臥虎藏龍!」

阿寶喺片中話,有技巧地高速轉彎(攞線)係可以快好多,雄哥亦話佢轉彎唔使煞車,抓緊個把手就得喇,形容「好容易」。今次參加咗30公里組單車活動嘅阿寶話,其實佢好希望香港有多啲城市繞圈賽,可觀之餘,車手亦都希望可以喺標誌性地方踩車,好似尖沙嘴、中環等,認為如果安排得好,會對車手好吸引。