文章日期 : 2017年9月13日

冰室舊物展 收藏家推介手繪掛畫

【明報專訊】綠寶橙汁、香港製造嘅鐘同玻璃花瓶,喺𠵱家嘅餐廳都好少見喇。由朱古力雪糕同可樂製成嘅「黑牛」,你又飲過未呢?200件1960年代起嘅冰室舊物近日變成展品,再現港人眼前。

90年代開始收藏冰室嘢嘅歐陽偉航,本身係中環老冰室海運茶冰廳嘅太子爺,今次拎咗展品出嚟,係希望新一代可以睇到以前嘅設計都好好。佢推介話,嚟到一定要睇幅手繪掛畫,係佢屋企當年專程搵畫師畫㗎。

80後奶茶迷崔氏兄弟,2014年開咗個facebook專頁,畫插畫之餘,仲講吓茶記嘅冷知識。展覽入面都有佢兩兄弟嘅展板,介紹吓茶記術語、食物同飲品。佢哋話想重新展現茶記嘅故事喎。

展覽由即日起至10月8日喺始創中心舉行,有興趣嘅可以去感受吓當年冰室嘅風味。